Kryeministri i Kosovës, Albin Kurti, në ceremoninë e zbulimit të shtatores së veprimtarit Metush Krasniqi, në Kamenicë, tha se ai ka qenë njëri nga veprimtarët më të paepur të çështjes kombëtare.

Kurti u shpreh se Metush Krasniqi po vjen në qytetin e Kamenicës për t’u përjetësuar në kujtesën e qytetit përmes shtatores.

“Duke ngritur këtë vepër të artit, ne, përpos që e nderojmë veprën e Metush Krasniqit, e theksojmë periudhën historike që ai përfaqëson, duke i bërë vend, një herë emirë, këtu në Kamenicë, elitës politike të cilës i takonte Metushi dhe trashëgimisë politike që la më pas ndër ne, prej saj dhe prej vet atij”, tha Kurti.

Sipas tij, idealet politike për të cilat u burgos, për të cilat qëndroi stoik në gjyq e në burg, për të cilat vdiq Metush Krasniqi, janë ideale edhe për kohën tonë, sepse, shtoi ai, ato i flasin edhe të tashmes, edhe aktualitetit tonë, ato na flasin edhe neve sot.

Kurti përkujtoi se dosja e procesit gjyqësor e Metush Krasnqit, e zhvilluar në seancën e 7 marsit të vitit 1959, në Gjykatën e Qarkut në Gjilan, fare mirë mund të lexohet si një traktat politik./rtk